حلقات يبقه انتا اكيد في مصر

خرج من بيته كالعادة مروش ولابس الحتة الزفرة اللي علي الحبل وضارب جيل وتمام التمام, صاحبنا ده حكايته هي حكاية كتير من شباب اليومين دول..ففوكاك من اسمه دلوقتي وتعالي أما نشوف هيعمل ايه النهاردة,صاحبنا كان مظبط بت من الكلية اللي مش بيروحها أصلا غير كل حين ومين,واتفق معاها علي خروجة كدا عالماشي وطبعا مقالتش لأ(ما أكيد هو الي هيشيل اليلة).المهم وهوا نازل(طبعا بيغني وفرحان وهيطير من الفرحة) قابل واحد صاحبه قدام البيت
- ايه يا عم علي فين كدا وايه الحلاوة والشياكة دي؟؟؟
- اااه....قروا بقا علي خلق ربنا,رايح أقابل الحتة يا عم.
- ماشي يا عم, ماشية معاك فول أوتوماتيك أهو.
- يييه...تاني؟؟!!يابني متفقرش فيها.يلا سلام بقا لحسن اتأخرت.

وهوا نازل أصلا قبل المعاد بساعة ونص..بس ما علينا. المهم مشي لأخر الشارع وخد ميكروباص,محدش يعني سأل هما هيتقابلو فين؟

بص يا سيدي...مدام صاحبنا معاه فلوس يبقي رايحين كوفي شوب جنان في المهندسين ,أما بقا لما بيكون مقشف وضاربه السلك بيقضيها في حديقة الحيوان أو الفسطاط ,يوميها كان معاه فلوس.أعد صاحبنا جنب السواق سرحان في ست الحسن, بس يسرح مين دا ماشي في شارع (....) يعني زحمة علي طول وكل واحد ماشي بالعربية حاطط رجل علي البنزين ورجل علي الكلكس,تقوللي وايده؟!!أقولك متدقش يعني مش فارقة وطبعا صاحبنا عمال يسمع كلام جميل من السواقين وهما....احم احم....بيحبو في بعض,كل واحد عايش. هوا اللي يسبق ويا سلام بقا لو حد سبقو...مش بقولك بيحبو بعض؟؟!!

وصل صاحبنا المكان واستني (المدام) هناك شوية وجت دالقة جردل برفان عليها وواخدالها وشين بويا تمام في وشها,ودخلو أعدو سوا سوا في الكوفي شوب
- تشربي ايه؟
- يا بنتي متتكسفيش . (ماهو الواد فيص بقا)
- طيب...برتقال.
- ماشي..لو سمحت..اتنين برتقال بعد اذنك.

أسيبكم بقا معاهم شوية.
- عمالتي ايه النهاردة؟
- عادي ولا حاجة,صحيت علي تليفون "سوسو" صحبتي الساعة واحدة وأعدنا نرغي شوية وبعدين كلمتني انت ونزلت,انت عملت ايه؟
- زيك بالظبط.صحاني الواد "مدحت" واكلمنا شوية وبعدين جتلك.
- مم....أنا مش عارفة هنعمل ايه في الامتحانات اللي قربت دي والواحد مفتحش كتاب ن أول السنة.
- ما كلو كدة يا بنتي, متقلقيش الواد "محمد" قال انه عارف مكتبة فيها ورق من الأخر نقراه قبل الامتحان وندخل نظبط التظابيط.
- طب ا شطة ابقا صورلي معاك.
- من عيني حاضر.

وجاب المتر البرتقال وقطع انسجامهم,شربو البرتقال وطبعا أعدين يبصوا لبعض ويبتسموا والواد أل ايه عامل فيها حنين وأم ماسك ايديها والتانية عملت مكسوفة فالأول بس بعد كدا سابتهاله.
الساعة جت تسعة ونص وهما سرحانين طبعا مع بعض في دنيا تانية, ومقدرش أبعد عنك ومقدرش أسيبك والكلام الحمصي اللي كلنا عرفينو دا.بصت هي في الساعة وقالتله : ايه دا,أنا انأخرت كدا يلا نروح بقا.
صاحبنا حط ايده في جيبه وطلع عشرين جنيه وحطها عالطربيزة وبص للجرسون وضحكلو (كمان بيبقشش وطبعا عشان الأخت المعاه تقول عليه واد جامد) وراح البيه وصلها أبل البيت بشارع كدة (طبعا مينفعش لحد البيت لحسن أبوها أو أي حد يشوفو يعكشو) ومسك اديها وكأنو بيودع واحد مسافر وسلمو علي بعض وروح هوا بقا والمود مفيش بعد كده وطلع كمل السهرة أدام التليفزيوت وعلي الساعة سبعة الصبح كدا قام ينام بعد ما ظبط يومه طبعا...يلا سلام بقا أشوفكو ان شاء الله في يوم تاني ن أيام صاحبنا

الـــحــلــقة الــثــانـيــة

ألو,لو سمحت ممكن أكلم محمد.
- أيوة..ثانية واحدة.
وجه محمد بقا زهقان وقرفان أصل أبوه صحاه من النوم عشان يكلم صاحبه علي التليفون (صاحبه دا اللي هوا صاحبنا بتاعنا)

- أيوة يابني عايز ايه عالصبح؟؟!. - ايه يابني انت كل دا نوم؟؟!!.
- يا عم لخص بقا عايز ايه؟أنا تعبان.
-يابني جايلك نوم ازاي بس والامتحانات خلاص فاضلها أسبوع وتبدأ.
- يعني هعمل ايه يعني؟! ما أنا مفتحتش كتاب من أول السنة ولا أعرف حاجة.
- ما أنا زيك برضو,طب أنا سمعت انك بتجيب ورق وكدا,متجبلي معاك الورق بتاع المواد بتاعتي.
-أه..قصدك علي الورق بتاع المراجعة النهائية,ماشي حاضر.
-ههههههه...مراجعة ايه يابني, احنا كنا ذاكرنا عشان نراجع؟؟!!.

المهم انهم عارفين انهم بيستهبلو وشكلهم هيشيلو مواد أو يسقطو أصلا بس عادي مش فارقة معاهم, واتفقو تاني يوم يتقابلو عشان يخدو من بعض الورق اياه.
اتقابلو تاني يوم أدام المكتبة بتاعت الورق وكانت زحمة موووت تقولش بيوزعو التموين؟!

بس دا العادي يعني,أهو كلو بيراجع عشان الامتحانات قربت,اللي ذاكر بيراجع
واللي ماذاكرش..ههههه...برضو بيراجع,بس معظم اللي بيجيبو الورق دا اللي هما زي صاحبنا دا.
- ايه يا عم دا,دا ولا سوق التلات.
- سوق علي مهلك سوق بكرة الدنيا تروق.
-انتا بتهزر؟؟!يابني أنا مش عارف انتا جايب البرود دا كلو منين!!
- من التلاجة....ههههه.
أه صحيح نسيت أقولكو,أصل صاحب صاحبنا دا أكبر منو بسنة في نفس الكلية,
الراجل خبرة بقالو أربع سنين ماشي كل سنة باتنين وصاحبنا يا عيني غلبان لسة أول سنة
بس هوا دخل الكلية من هنا واستلمو الأخ صاحبو دا من هنا وشكلو هيخليه يسير علي نهجه
...ههههه.
- هات يا عم الورق خليني أمشي...
- خد يا عم.
- يلا سلام.
- سلام.
روح صاحبنا البيت ومعاه كومة ورق,بتاع كل المواد بقا وعايز يلحق يلم أي حاجة.. راح علي السرير وانتخ وطلع الورق يبص فيه ...هوا بص من هنا ووشه جاب ألوان الطيف من هنا.
معزور أصله لقا كلام أول مرة يشوفو يا عيني وفضل متنح وكأنو ماسك ورق باردي مكتوب عليه بالهيروغليفي ... ألاك مبدهاش بقا وراح ماسك الورق وأعد يحفظ بقا الحاجات زي ماهية بشكلها,هيعمل ايه مقداموش غير كدة. وصاحبته اياها بتاعت المرة اللي فاتت
ولا سأل في أبوها ولا جابلها ورق ولا أي حاجة.
بس ايه بقا... طلعت ناصحة هية كمان ونخربت لحد ما جابت الورق.
شوف يا سيدي...العيال تخش الكلية كتاكيت ولا ليهم في البتنجان,مفيش شهر ولا اتنين وتلاقيهم جايبين أخبار الكلية كلها بالناس اللي فيها بالدكاترة بالعايدين السنة بكلو... الا اللي هما تلاقيهم بقا بقالهم تمن تسع سنين في الكلية تشوفهم تحس انهم دكاترة أصلا مش طلبة... الواد من دول ممكن يفضل في الكلية لحد ما يخلف وابنه يدخل الكلية ويبقا أدو.... هههههه
وتسأل الواحد منهم ليه يابني سايب نفسك كده؟؟ يقولك يا عم يعني هتخرج أعمل ايه هوا في شغل؟!..عيزين تقولو عندو حق,مش كدة؟؟...ههههه
الأسبوع جري بسرعة وجه أول يوم امتحان وصاحبنا صم وطلصأ الدنيا في بعض وداخل الامتحان يحيي أمجاد العظماء اللي أبلو (أقصد طبعا اللي شالو أوباح في السنين اللي فاتت)...وأعد صاحبنا في اللجنة مستني ورقة الامتحان بسرعة أبل الكلمتين اللي عندو ما
يطيرو ; اللي هما كدا كدا هيحطهم في الورقة ويمشي ملوش دعوة بالأسئلة.. وزي ماتيجي بقا

فاتت ساعة..اتنين وطلع صاحبنا زي ما دخل ,أهو حط اللي عنده وخلاص وهوا وبخته بقا يا اما تقع ورقته في ايد دكتور من بتوع (اقلب واجري) وفي الحالة دي ممكن يعدّي,أو تقع بقا في ايد دكتور مبيرحمش.. وفي الحالة دي هيلبس في الحيط ويشيل الظلط.

بنفس الطريقة فات تاني امتحان وتالت ورابع وخلّّّص وخد الأجازة الباشا

الـــحــلــقــة الـــثــالــثــة

جه واحد صاحبه معاه عربية و زمرله علشان يخرجوا زي ماكانوا متفقين و كان معاه بقية الشلة
- بييييييييييييييييييييييييب بيييييييييب.
- ايوة يابني خلاص نازل اهه...الصبر حلو.
- طيب انجز يا عم الكُتكوت بسرعة.
الواد صاحبنا كان لابس و متشيك, بس مش اوى يعني...أصل بيني و بينك مفيش بنات في الخروجة دي فعادي يعني هيقعد بوزه في بوز صحابو.
- ايه يا رجالة هنروح فين النهاردة؟
- ممممممم...ايه رأيكوا نروح جامعة الدول؟
- ليه يلا؟؟ عندك معاد مع عمرو موسى و لا ايه؟
- كركركركركر....المفروض أضحك بقى و لا ايه يعني؟!
- لا عادي ممكن تبين سنانك بس..ههههه
- قصدي على شارع جامعة الدول ياخفيف عصرك.
- ما انا عارف بس بهزر عادي يعني...طب ماشي يلا بينا.
طبعا مش محتاج أقولكوا هما رايحين ليه هناك...شباب بقى فاضي المهم وصلوا هناك و ماشيين بالراحة بالعربية يعاكسوا دي و يعيبوا على دي و مش سايبين واحدة في حالها، عايز تسمع؟؟...اسمع بس متعملش زيهم....كده كخ.
- الحق يلا اللي ماشية هناك دي...قنبلة ياد يخرب بيت كده.
- ايووووووووه يا جدعان...ايه ده؟!!..هو ده مش تقوللي الغفر اللي معانا في الكلية، الواحدة تبصلها تحس انها جاية تقبض عليك....ههههههه.
- لا لا لا...الحق التانية اللي هناك دي، يانهار مدوحس ده الاسفلت تحتها هيولع خلاص...الله يكون في عونه، ما تيجي نلاغيها يا عم شوية نشوف ميتها يمكن نبقى صحاب و لا حاجة؟
- يا عم تشوف ميتها ايه بس؟!... هي ترعة؟!
- استنى بس....بس بس... بس بس.... يا بس بس...يا حاجة... ياخالتي.... طب اي حاجة طيب....نظرة.... كلمة.... شتيمة حتى، خارسة دي و لا ايه؟!
- ههههه... شكلك وحييييييش و هي حالقالك كده.
- اوعى انت الحتة اللي جاية دي.
- فين دي ياعم؟
- اهي اللي هناك دي.
- دي؟؟!! دي شبهك يا عم، ركب نضارة يا عم الكفيف.
- اه صحيح، عندو حق يتريق عليك...ايه اللي انت بتبصلها دي؟!!
واحد فيهم كفاءة بقى في المعاكسات أضاف بردو مقعدش ساكت
- ايه يا حلوة...هي الغوريلا هربت من جنينة الحيوانات و لا ايه؟!!
العيال ميعجبهمش حاجة ابدا، يلاقوا واحدة سايبة شعرها يقولولها ايه ده ضاربة شعرك في الخلاط، يلاقوا واحدة لمة شعرها يقولولها ايه ده هو الخلاط بايظ و لا ايه...هههههه
المهم فضلوا واقفين بالعربية يرمو بالكلام على الرايحة و الجاية لحد مازهقوا.
- يلا ياعم نروح حتة نقعد و لا نعمل حاجة انا زهقت.
- طيب اشطة يلا...بس هنروح فين؟؟
- تعالا نروح نقعد على القهوة اللي عند الواد ميدو.
- يلا بينا.
طلعوا بالعربية من هناك لحد القهوة و خادلهم يجي ساعة في الطريق...كان زحمة و كلوا ميكروباصات، هي المسافة لو انت ماشي ... تاخد تلت ساعة، لو راكب... ساعة الا ربع على الاقل، وصلوا هناك و ندهوا على الواد ميدو و نزلهم و قعدوا على القهوة اياها.
صاحبنا بتاعنا بقى يا عيني ملوش في السجاير و لا الشيشة و الحوارات دي... لما بيقعد معاهم على قهوة اخره شاي بنعناع و يقعدوا هما يتريقوا عليه بقى.
- ها يارجالة.. شيشة تفاح و لا هتغيروا؟!
- لا تفاح زي كل مرة عادي.
- و كوكو طبعا شاي بنعناع كالعادة...حبيب بابا ...كومونوس... ياختي كاميلا، شاي ماشي و لا اجيبلك الرضهو يا بيضة احسن؟؟؟!
الباقى كلوا ماتوا من الضحك و صاحبنا اتغاظ بقى و قالك مبدهاش اشيش زيهم احسن.
- لا ياعم هاتلى شيشة زيكم، و انا صغير و لا ايه؟
و عمل فيها عم الجامد و هي الشفطة اللي شفطها و مشفطش غيرها...الدنيا ضلمت عندو... و عينوا احمرت و اداها سيمفونية كحة لمدة نص ساعة متواصل لما عدم العافية.
-يلا نروح يا عم الواد هيموت.
- يلا كفاية كمان انا مطبق من امبارح.
و صاحب العربية و صل صحابه كل واحد بيته و وصل صاحبنا اللي كان جاب جاز خلاص من شفطة واحدة وطلع ادلق على السرير محسش بنفسه...كان يوووووم.

الـــحــلــقــة الـــرابـــــعـــة

صاحبنا النهاردة محد ش كلموا عشان يخرجو يروحو اى حتة و كان يوميها صا د ف ان ابوة كان اجازة من الشغل و قاعد هو كمان فى البيت . الطبيعي و العادى و اللى بيحصل كل يوم ان صاحبنا دا و ابوة بيشوفوا بعض قليل اوي ,ابوة بيصحى الصبح بدري يروح الشغل وا لوا د نايم و يرجع مبلا قيهوش فى البيت و بعدين بينام بدرى عشان شغلو , بيكون صاحبنا لسا مرجعش من برة فالنهاردة الائتنين مع بعض من الصبح و اكيد لازم يحصل كلام بينهم اللى قليل لما بيحصل و بيكون بردو في فرص و صدف زى دي واد بيشوف ابوة صد فة ..... يا نهار سباريس!!

بس متستغربش يعنى لان دا بقا الطبيعى عند ناس كتيير اليوميين دول ,تعالى نشوف ايه اللى حصل بينهم...

ابوه متعود يصحى بدري عشان شغلوا اللى بيروحوا كل يوم ,وصاحبنا كل يوم يرجع بعد نص الليل يعد يقضيها شو ية تلفزيون او على النت لحد الساعة سابعة الصبح و بعدين ينام .و طبعا مش بيصحى قبل العصر. الساعة دلوقتى 12 الظهر وابوة صاحى من بدري و طبعا صاحبنا يا دوباك مبقالوش كام ساعة نايم.

_الساعة 12 يا بنى قوم كفاية كدة ... انتا يا بنى اصحي,عندك حق مانتا نايملى وش الصبح سيادتك سهران طول الليل قوووووووووم يا !!!!

الشخطة اللى طلعت فجاة فى الاخر دى خلتو قام فط من السرير مفظوع.

_اية يا بابا فى ايه؟؟صحتنى لية؟؟

_في ايه ؟؟!!ما طبعا ما نتا و لا دريان بحاجة ,مروق دماغك و خروجات كل يوم مع الصيع صحابك.

_انا مش مصاحب صيع.

_زعلت اوي يا خوية؟!ال يعنى الواد مصاحب ملايكة والبراءة بتشع من وشوشهم ... يا بنى لما بتنزلهم شكلكو بيبقا عربجية ماشين فى الشارع من الضحك و المرقعة اللى بتبقو ماشين بيها .

_ايه اللى بتقولو دا يا بابا ؟! الواد محمد ابوة لوا و الباقين برضو كويسين .

_لوا؟!لوا فى بوزو يا شيخ ...دا اكتر واحد بايظ فيكو ابو عرف ديك دا ...... مش ناوى تعملك حاجة مفيدة فى الاجازة المهببة بتاعتك دى؟

_ادينى بخرج .

_يا دا نتا حمار؟!بقول حاجة مفيدة ,و انتا بتسمى خروجك مع المقاطيع دول حاجة مفيدة ؟!يا دى الخيبة.

- يعني هعمل ايه بس؟؟! برجع من برة هلكان يادوباك أتفرج علي التليفزيون شوية لحد ما يجيلي نوم ولأقوم أنام.

- يا حرااام!! شقيان يابني ربنا يكون في عونك ويقويك يا حبيبي, من غيرك كان البيت خرب وملقيناش حد يصرف علينا..يا بارد يا تنح يا جبلة,,خلي عند اللي جابوك دم وحس بالتعب اللي بنتعبو أنا وأمك عشان نصرف عليك انتا وأختك الصغيرة ...مش عارف نعمل معاك ايه بس؟!
أنا زهقت منك يا شيخ ومن بلاويك.

تفتكرو هيحس علي دمّه وميدايقش أبوه؟؟؟

هكمل بكرة ان شاء الله
لانى تعبت

هههههههههههههه
جميله جدا
مستنيه الباقى